Eykt ehf. er alhliða verktakafyrirtæki sem hefur skipað sér í fremstu röð slíkra fyrirtækja á Íslandi. Fyrirtækið var stofnað sem sf. 1986 en breytt í ehf. árið 1992. Á þeim næstum 40 viðburðaríku árum sem liðin eru höfum við öðlast víðtæka reynslu af öllum gerðum verkefna – allt frá flóknum framkvæmdum í þrengslum miðborgarinnar að erfiðisvinnu við óblíðar aðstæður á fjöllum og í straumhörðum fjörðum. Við tökum virkan þátt í stærri útboðum en leggjum ekki síður áherslu á eigin þróunarverkefni.

Fyrstu árin var Eykt verktaki og undirverktaki í misstórum verkum. Með árunum fór hlutur eigin verkefna vaxandi og allt frá um 2000 hefur fyrirtækið lagt mikla áherslu á þróun stórra  verkefna þar sem skipulag, hönnun, framkvæmd og eignarhald mynda órofa heild. Fyrsta stórverkefnið af þessu tagi er Höfðatorg í Reykjavík, sem hefur verið í þróun og uppbyggingu frá árinu 2001 og er umfangsmesta verkefni sinnar tegundar á Íslandi. Á Höfðatorgi er nú að rísa síðasta stórbyggingin í klasanum, sem mun hýsa nýjar höfuðstöðvar Ríkisskattstjóra.

Sérfræðingar í steinsteypu

Steinsteypa leynir á sér sem margslungið og vandmeðfarið byggingarefni. Við höfum í gegnum tíðina innleitt ýmsar nýjungar í uppsteypu og aðferðum, svo sem notkun á kúluplötum í gólf, sem eru mun léttari en hefðbundnar steyptar plötur og leyfa stærri súlulaus rými. Léttleiki og fágun göngubrúnna yfir Hringbraut náðist með sérlega vandaðri steypuvinnu, og sjónsteypa í Borgartúni 8-16 krafðist mikils af okkar mannskap. Eykt hlaut Steinsteypuverðlaunin fyrir brýrnar yfir Hringbraut 2010 og  Nýja bíó/Grillmarkaðinn 2013.

Þekkingarfyrirtæki í byggingariðnaði

Traust starfsfólk með bestu fáanlegu kunnáttu á sínu svið er lykillinn að velgengni Eyktar. Við viljum vera eftirsóttur vinnustaður og halda starfsmannaveltu vel innan eðlilegra marka, hvort sem er meðal handverksfólks eða annarra sérfræðinga á þeim mörgu sviðum sem snerta starfsemina. Góður starfsandi, víðtæk reynsla og stuttar boðleiðir skila sér í vönduðu verki og skilvirkum vinnubrögðum.