Steypuvinnu við meðferðarkjarna nýja Landspítalans lauk í gær þegar síðustu átta rúmmetrarnir runnu ljúflega á sinn stað. Þeir lögðust við þá 56.920 rúmmetra af steinsteypu sem farið hafa í meðferðarkjarnann frá því uppsteypa hófst í febrúar 2021. Þrátt fyrir veruleg og óvenjuleg ytri áhrif á borð við heimsfaraldur og stríð í Úkraínu hefur þetta umfangsmikla verkefni gengið mjög vel og er þessum stóráfanga nú lokið innan tíma- og kostnaðarramma.
Uppsteypa bílastæðahúss (fjær) og rannsóknahúss (nær) er í fullum gangi en meðferðakjarninn er fullsteyptur.
Meðferðarkjarninn er hjarta nýbygginga Landspítalans við Hringbraut og langstærsta byggingin á svæðinu. Hún er 6 hæðir ofanjarðar og 2 neðanjarðar, um 70.000 fermetrar að flatarmáli og meðal allra stærstu steinsteyptu bygginga landsins. Kjarninn er í raun heilt sjúkrahús, með skurðstofum og legudeildum, rannsóknum, bráðamóttöku og endurhæfingu, en hann mun tengjast fleiri byggingum Landspítalans bæði ofan- og neðanjarðar, svo sem barnaspítala og kvennadeild í eldri byggingum og nýju rannsóknahúsi og bílageymsluhúsi.
Uppsteypu meðferðarkjarnans er þá lokið og byggingin þegar komin á næsta byggingarstig en steypuvinna heldur áfram á fullri ferð. Þúsund rúmmetrar runnu í rannsóknahúsið í dag og á morgun fara 330 til viðbótar í bílastæða- og tæknihúsið, en þessar byggingar rísa við Hringbrautina sjálfa austan við hin nýju Fífilsgötu. Bílastæðahúsið mun rúma 500 bíla og 200 reiðhjól, en rannsóknahúsið sameina nánast alla rannsóknastarfsemi spítalans undir einu þaki.